Меѓународниот ден на медицинските сестри и техничари се одбележува секоја година на 12 мај, во знак на сеќавање на роденденот на Флоренс Најтингел (FlorenceNightingale) – основоположникот на модерното сестринство. Родена на 12 мај 1820 година во Фиренца, Италија, и целиот свој живот го посветила на унапредување на медицинската нега и правата на жените. Најтингел е позната и како „Дамата со светилката“, а во 1860 година го основала првото училиште за медицински сестри во Лондон.

Флоренс остави длабока трага во медицината, со тоа што ги поставила основите на професионалната медицинска нега, ја промовирала важноста на статистиката и го вовела концептот на организирана болничка грижа, кој денес е применет низ целиот свет.

Тема за 2025 година:„Нашите сестри. Нашата иднина. Грижата за медицинските сестри ја зајакнува економијата“

Оваа година темата, избрана од Меѓународниот совет на медицински сестри (ICN), ја нагласува важноста на здравјето и благосостојбата на медицинските сестри како клучни за силни здравствени системи и економски развој. Таа продолжува со претходната тема од 2024 година, „Економската моќ на грижата“, и се фокусира на потребата од поддршка за физичкото, менталното и емоционалното здравје на медицинските сестри. Целта е да се обезбедат безбедни работни услови кои ќе доведат до подобри здравствени резултати и поголема економска продуктивност.

Во ерата на брз технолошки развој, медицинските сестри се оние што го поврзуваат технолошкиот напредок со персонализирана нега. Тие имаат клучна улога во тоа дигиталната револуција да служи на здравјето и достоинството на секој пациент.

Клучни теми и фокуси за 2025:

·         ДИГИТАЛНА ЗДРАВСТВЕНА ТРАНСФОРМАЦИЈА

Медицинските сестри активно учествуваат во проекти поврзани со телездравство, AI алатки, и дигитални системи кои овозможуваат побрза, побезбедна и поефикасна грижа за пациентите.

·         ИСТРАЖУВАЊЕ ВОДЕНО ОД МЕДИЦИНСКИ СЕСТРИ

Во 2025 година се поттикнува и препознава улогата на сестрите како истражувачи – создавачи на нови модели на работа и подобрување на клиничките резултати.

·         ОБРАЗОВАНИЕ И ПРОФЕСИОНАЛЕН РАЗВОЈ

Се нагласува потребата од постојан професионален развој и адаптација кон новите предизвици. Модерното образование за медицинските сестри вклучува симулации, онлајн обуки и флексибилни програми за учење.

·         ЗАСТАПУВАЊЕ И ЈАВНО ВЛИЈАНИЕ

Медицинските сестри сè повеќе се вклучуваат во креирање на здравствени политики. Тие го користат својот глас за застапување на пациентите, правична здравствена грижа и решавање на проблемите со работната сила во здравството.

·         ГЛОБАЛНА ЗДРАВСТВЕНА БЕЗБЕДНОСТ

Во време на глобални здравствени предизвици, сестрите играат незаменлива улога во одржување на безбедноста, издржливоста и подготвеноста на здравствените системи.

Референци