Базените да се полнат со хигиенски исправна вода која секојдневно ќе се менува или надополнува со свежа, вели д-р ЕмилијA Богоевска, специјалист по хигиена.
Приватните и малите детски базени се сѐ попопуларни начини за разладување во текот на летните жешки денови. Расте бројот на семејства кои во дворовите од домовите каде што живеат или во викендичките поставуваат приватни монтирани или базени на надувување. Некаде тие се детски со мали димензии, а некаде големи со должина и ширина до десетина метри и височина до 1,5 метар. Едни од поголемите монтажни базени се со капацитет од 54.400 литри вода.
Здравствени проблеми доколку не се одржува хигиената на високо ниво
Д-р Емилија Богоевска, специјалист по хигиена, раководителка на Одделението за хигиена при Центарот за јавно здравје во Битола, вели дека е важно базените да се чисти, водата што се користи во нив да биде со квалитет на вода за пиење и секојдневно да се менува или надополнува.
– Поради недоволно познавање или непочитување на правилата за безбедно користење на базенот, можно е здравјето на корисниците да биде доведено во прашање. Ризикот од болести или инфекции најмногу се должи на фекалната контаминација. Недоволно чиста вода во базените, која е последица на слабо извршена дезинфекција или нејзино отсуство, може да предизвика воспаление на надворешниот ушен канал („пливачко уво“), гастроинтестинални нарушувања, бактериски или вирусен конјунктивитис, уринарни инфекции, вирусни брадавици и габични инфекции на кожата – вели д-р Богоевска.
Таа додава дека втор значаен ризик се физичките повреди и опасноста од давење, кои настануваат како резултат на несоодветно однесување на корисниците. Не треба да се заборават и последиците од екстремните температури како сончаница, топлотен едем, топлотно црвенило, топлотна синкопа и друго.
Во детските базени водата да биде со квалитет како онаа за пиење
Богоевска посочува дека правилата и препораките за однесување на корисниците на базените се исти и за јавните и за приватните базени.
– Разликата е во тоа што сопствениците на јавните базени се должни да ја контролираат безбедноста на водата во овластени акредитирани лаборатории како Центри за јавно здравје, за разлика од сопствениците на базените во приватна сопственост кои ја немаат оваа законска обврска – додава таа.
Јавните базени, за разлика од домашните, имаат посебна инфраструктура, како соблекувални, дезо-бариери и тушеви за капење пред влегување во вода, пристапни патеки околу базенот, преливни канали за собирање на пловечки нечистотии, систем за филтрирање и дезинфекција на вода и обучен технички персонал за одржување на базенот. Од тие причини, и одржувањето на квалитетот и безбедноста на водата во приватните базени, особено малите детски базени, е уште потешко да се постигне отколку во јавните базени.
– Приватните и малите детски базени мора да ги почитуваат сите норми за да бидат здрави и безбедни места. Водата во нив мора да се одржува според јасни правила. Прво и основно правило е полнење на детските базени со хигиенски исправна вода со квалитет на вода за пиење, по можност со вода од градски водовод – нагласува Богоевска.
Базенот редовно да се чисти и секојдневно да се освежува со нова вода
Во однос на фреквенцијата на менување на водата, тоа зависи од волуменот на базенот, бројот на корисници во еден ден и нивните хигиенски навики. Други важни околности се дали базенот е дезинфициран или не, дали има систем за филтрирање, количината на внесени нечистотии, како што се листови, распад на органски материи, влегување на домашни миленичиња и слично.
– За малите детски базени, кои се финансиски и најдостапни, се препорачува водата да се менува секојдневно. Поголемите базени кои имаат сопствена филтрација и дезинфекција, секојдневно да се надополнуваат со свежа вода, да се врши дневно механичко чистење на лебдечки нечистотии и седимент, како и редовно перење на филтрите и нивна замена по одреден временски рок на користење кој зависи од повеќе фактори – додава Богоевска.
Ако се прави дезинфекција, тоа да биде со голема претпазливост
– Пред да се почне со дезинфекција, треба да се отстранат сите органски нечистотии, со цел да се постигне максимален ефект на дезинфекцијата. Лицата што дезинфицираат треба да бидат обучени за одржување и мерење на резидуална концентрација на дезинфекционото средство во водата, како и за несаканите штетни ефекти врз здравјето на корисниците – додава д-р Богоевска.
Доколку се применат сите овие совети, базените кои се одлично место за разладување и забава во летните периоди ќе бидат и места безбедни за здравјето на корисниците, особено за малите децa.
